سنين عمري ملتك | حيدر حسين سويري

حيدر حسين سويري | العراق

 

لا تجرجرني وراك

سنين عمري ملتك

انا مو كَلبي نساك

انا روحي فقدتك

 

جنت أكَول الحب هديه

كَلب وي كَلب إلتقى

بس شفت منك أذيه

حتى لو لحظة شقى

انا شارد من هواك

روح عالج علتك

انا مو كَلبي نساك

انا روحي فقدتك

 

صافن ودومك تفكر

وما تشاركني إختيارك

أنت كَلي شكثر أصبر

وتستعر في كَلبي نارك

روح مو انت هذاك

بيوم روحي عشكَتك

انا مو كَلبي نساك

انا روحي فقدتك

ذوبت شخصي وكياني

وكَلت أني وانت واحد

وحاربت أهلي وزماني

من أجلك ومازلت أعاند

عذبت نفسي الرضاك

تالي تتركني وراك

انا مو كَلبي نساك

أنا روحي كرهتك