الرئيسية | شعر | فجر | عادل لطفي

فجر | عادل لطفي

عادل لطفي

 

1

أنا

أثَر الريح عْلَى باب السيّاب

دمّ المَسيح فْ عْروق الدّوالي

لحْمُه ف السّْنابلْ

أنا

ظلّ المحبّة

حجاب الشوق

صْدى الطريق للفجر

أنا

ريحة الدهشة عْلى وجه الصباحْ

ملّي يحلّ عينُه

عْلى بْنادمْ يريّبْ جنّتُه بيدّيهْ

و ينزّلْ الباطلْ عْلى التّفّاحْ

2

بدات الخطوات تتقشر

و بان حفا الطريق

الليل لحس ضو عينيك

بديت تشوف

عرا الروح

الفجر عرشه على الما

و الاوقات عطشانة

3

نسيتِ العاهد اللي عطيتِــيني ف فجر معطر بالخزامى و حلّفتيني ماننساه. من بعد جوج سطور خطفتي اللّغة و هربتي . من بعد ربعة سرقتي المعنى . من بعد جوج ورقات طعنتي الخيال و ماماتش . و حتى أنا ماغاديش نموت حيت خلّيتي ف عروقي الموسيقى .

/ طريق الخزامى جرحني /

قُلتِ : يلا وصلتِ نخنقك

قُلتْ : يْلا وصلتْ نخلقك

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.