مْرايا تْشوفْ صوتْ شْقوفْها | عبد الكريم بوعبسة

عبد الكريم بوعبسة (الجزائر):

 

شظية أولى

رْبيع الكلمة يَتْمَشّى

وَخْيالَهْ في عين الشمس لاحْقَهْ.

شظية ثانية

الحرف المقروضْ يْبَسْ فْعرق الما

صابْتَه لَحمامة

عْجَبْها

دَّاتَهْ تكمَّلْ بيه دارْها.

شظية ثالثة

الحرفْ شافْ حْبيبتَهْ

فْكلمة ثانيه

شنقها

وْقاسْ روحَهْ

وْهو يشربْ من دمْها

شظية رابعة

دمعة فرحانة طاحتْ في وادْ

غْرقْ الوادْ فيها

فرحانْ

شظية خامسة

الطريق تلاقاتْ بالربيعْ

شافتْ في عينيه وْسَكْناتَهْ

تشربْ منَّهْ وْخايفة يْطَرَّدْها

تلبْسَهْ وْخايفة يْطَرَّدْها

طرّدْها الخوف.

 

معسكر: جوان 2016