الرئيسية | شعر | بنت الحضرة | ادريس بلعطار

بنت الحضرة | ادريس بلعطار

ادريس بلعطار

يآآآآا بنت الحضرة
جيتك اليوم تمديني
بسواكن لونها عسل
راه الحال مساس
……….
نشفت النظرة
من ضو كان يديني
لزريبة العشق عليل
ويردني لاباس
…..
ديني..ديني
ولا مديني
من ثوب الفرحة حنطة
لا تخلي سلهام القنطة
على ظهري حتى يتبالى
وخيوطو تتساس
……
ديني ديني
ولا مديني
ب ڭاع الضحكات
اللي شاطوا
على شراجم الكيات
نفرقها لبوس
على ڭلوب يبسها لياس
يابنت الحضرة
…..جيتك هذ النوبة وحدي
باغي نودي..
ونغسل ذنوبي يا وعدي
من مرفودة
كانت معهودة
وتعطلت ليوم ف معطاها
…..
جيتك هذ النوبة نلوح بياضي
على منجج كان يسدي
للقبة في فراشها
وكان يسدي في غطاها
….
هاكي
لهوى منڭاش وبلا بحوط
نڭي
هذ الڭلب من طعنات
كان لغدر هرّاها
……
هاكي
الباقي فالروح خيوط
وكففي
ف كتان الفڭد شرڭات
كان النسيان رشّاها

وهاكي هاكي
عظامي بلا حنوط
وفين ينوض
البسباس والدرياس
دفنيها..وقراي
سورة العشق حداها
….
انت يا ذآآآاك لبحر
وانايا هذ الواد
محبوس
بسدودا شداد
بقطرة بقطرة
حجرة /حجرة
نريبها ونجيك
ڭد لاموني..
ڭد لاموا
من قومها وبناها
….
انت يا ذاك لبحر
مواجو على الدوام تخاصم
وانايا هذ الواد
ك العادة جاي نتراحم
جايب
من الثلج بيوضة
ومن القرفة عواد
وجايب لرياح
مرشات للندى
وجايب
الما لحلو رجداد
وجايب
من لبحيرة صريرة
بشلا مشامم
وشلا نسايم
وجايب
من لبحيرة
ريحة ترابهاوحصاها
….
يابنت الحضرة
الحضرة مشات
وطال بيناتناهذ المد
ترادفوا ….
على الروح الشحطات
حتى عييت انا نحسب ونعد
وملوكي هربت وجفلات
شحال يڭد بخوري يحبس و يرد
لا فال
به الفال يتسفال
ولاحال
جاب لحوال
على حال
من غير جدبة
مع جدبة
وجدبة وجدبة
صاروا جدبات
والميزان بالصح خطاها

يابنت الحضرة
جيتك اليوم مديني
انت يا ذآآاك لبحر
وانا سفيني ليوم مجروحة
انت يا ذآاك لبحر
وانا طعامي خطاتو ملوحة
جيتك مديني
بالهوى مديني
بالصفا مديني
بالدفى مديني
مديني مديني
بالوفا ولاديني
لزريبة العشق
واخ ضرها
غلب ليوم دواها

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.